Ekipi i UN-HABITAT u ftua ta prezentojë Programin e Mbështetjes së Komunave në Planifikim Hapësinor në takimin e koordinimit të donatorëve, organizuar me 17 Mars 2009 nga Ministria e Administrimit të Pushtetit Lokal. Në fjalën e tij hyrëse, Ministri Sadri Ferati e nënvizoi rëndësinë e mbështetjes së komunave kosovare nga donatorët në çështjet që kanë të bëjnë me ngritjen e kapaciteteve dhe mbështetjen teknike në implementimin e projekteve.

Arijeta Himaduna, zyrtare e UN-HABITAT/MuSPP, i prezentoi objektivat dhe aktivitetet e planifikuara të MuSPP-it për 2008-2011, të fokusuara në përmirësimin e kualitetit jetësor të qytetarëve të Kosovës përmes zhvillimit të planifikuar. Ajo i përmendi disa fusha kryesore të MuSPP-it ku përfshihet konsolidimi i procesit të planifikimit, mbështetja e projekteve kapitale që kanë të bëjnë me planifikim, përmirësimi i kushteve jetësore, siguria për banorët që jetojnë në vendbanimet joformale, mbështetja e komunave për bashkëpunimet ndër-komunale dhe planifikimi regjional si dhe ngritja e kapaciteteve në nivelin qëndror në mbështetje të komunave në detyrat projektuese. Znj. Himaduna vuri theks edhe në qasjen e bazuar në projekte si pjesë e implementimit të programit dhe në mbështetjen teknike profesionale për planerët komunal.

Në takim morën pjesë edhe përfaqësues të ICO-së, UNDP-së, USAID-it, Bankës Botërore, OSBE-së, Zyres Zviceriane si dhe përfaqësues nga qeveritë lokale dhe komunale.