Kombet e Bashkuara e kanë caktuar të hënën e parë të Tetorit si Ditën Ndërkombëtare të HABITAT-it. Kjo ditë kremtohet çdo vit në qytete në mbarë botën që nga viti 1986. Motoja e ditës botërore të Habitatit për këtë vit ishte ‘Ta planifikojmë të ardhmen tonë urbane” që nënkupton qasjen gjithpërfshirëse si princip kryesor të planifikimit hapësinor bashkëkohor. Kremtimi kryesor u mbajt në Washington DC, SHBA.

Këtë vit, si vend i kremtimit të Ditës Botërore të Habitat-it në Kosovë u zgjodh Juniku. Juniku është një komunë e vogël në pjesën jugperëndimore të Kosovës. Është i njohur për lokacionin piktoresk, kullat tradicionale dhe pikën më të lartë malore në Kosovë (Gjeravica 2656 m). Organizatorët: Ekipa e MUSPP-it, Komuna e Junikut dhe CHwB-ja u fokusuan në tërheqjen e të rinjve dhe marrjes së ideve të tyre për të ardhmen. Pjesë e kremtimit ishin dy aktivitetet e pavarura nga njëra tjetra me temën “Si e shihni Junikun pas 15 viteve”, ku  gara në vizatim u mbajt në Shkollën Fillore “Edmond Hoxha”, derisa  gara në shkrimin e eseve në shkollën e mesme  “Kuvendi i Arbërit”.

Me qëllim të ruajtjes së trashëgimisë kulturore egzistuese, komuna i hyri një detyre ambicioze në hartimin e planeve zhvillimore lokale që do ta mbronin trashëgiminë kulturore dhe do të krijonin kushte për zhvillim ekonomik lokal. Komuna e Junikut tanimë veq se e ka aprovuar Planin Zhvillimor Urban dhe Planin Regulativ Urban. Duke i ndjekur udhëzimet e vëna nga Ligji për Planifikim Hapësinor dhe prioritetet e Ministrisë, tashmë ka filluar me hartimin e Planit Zhvillimor Komunal të Junikut.

Dita Botërore e Habitat-it u ofroi mundësi të rinjve që të angazhohen në lidhje me të ardhmen e qytetit të tyre. Angazhimi i tyre rezultoi me dhjetëra ese dhe po aq vizatime. Autorët e punimeve më të mira morën mirënjohje derisa idetë e prezentuara nga të fëmijët dhe të rinjtë e Junikut do të kontribuojnë në vizionin e PZHK-së së Junikut dhe do ta nxisin pjesëmarrjen e mëtutjeshme në planifikimin e zhvillimit lokal.