Komuna e Junikut në mbështetje të Programit të Mbështetjes së Planifikimit Hapësinor Komunal të UN-HABITAT-it, Trashëgiminë Kulturore pa Kufi(CHwB) si dhe me Institutin për Planifikim Hapësinor, është në hartim të Planit Zhvillimor Komunal (PZHK). Në fazën e tashme të hartimit të PZHK-së nevojitet të organiziohen punëtori që u përkasin shumë fushave, ku për këtë qëllim me 21 Prill u organizua punëtoria e trashëgimisë kulturore, natyrore dhe e turizmit. Pjesëmarrës në këtë punëtori ishin zëvendëskryetari i Junikut, Z.Nimon Tofaj, stafi professional në Komunën e Junikut, MuSPP/UN-HABITAT-i, CHwB-ja, IPH-ja, përfaqësuese të organizatave të grave, pronarë të kullave(shtëpive tradicionale) si dhe nga OSBE-ja.

Qëllimi kryesor i punëtorisë ishte prezantimi i rezultateve të dala nga anketa e Trashëgimisë Kulturore pa Kufi, që kishte të bënte me krahasimin e situatës aktuale, me atë të vitit 2007. Punëtoria vazhdoi me rishikimin e qëllimeve strategjike të të gjitha fushave, zhvillimin e projekt propozimeve të veçanta dhe hapave të mëtutjeshëm që do ta formësonin strategjinë brenda PZHK-së.

Pjesëmarrësit në këtë takim, e theksuan nevojën e ruajtjes së trashëgimisë natyrore dhe kulturore me aktivitete të ndryshme që e promovojnë turizmin dhe shfrytëzimin e tij si mjet për zhvillim ekonomik. Nga kjo punëtori u dhanë informata shtesë, të cilat do të përfshihen në PZHK.