Komuna e Gjilanit, Programi i Mbështetjes së Planifikimit Hapësinor Komunal (MuSPP) dhe Gjimnazi “Zenel Hajdini” organizuan punëtori për zvogëlimin e dëmeve në rast të tërmeteve.  Punëtoria u përcoll nga dy studime të bëra nga UN-HABITAT-i dhe Komuna e Gjilanit, mbështetur nga instituti ISIIS nga Shkupi, që edhe njëherë e konfirmoi se Komuna e Gjilanit bën pjesë në një zonë aktive, ku hyn edhe Shkupi. Me këtë rast, u theksua se komuna prioritet të saj e ka përforcimin  ndërtesave publike, në fokus të veçantë ndërtesat shkollore.

Punëtoria kishte si qëllim kryesor ofrimin e njohurive bazike për fatkeqësitë natyrore dhe përgatitjen, në rast të tyre, për nxënësit dhe mësimdhënësit e kësaj shkolle. Në prezentimin e tij, Nehat Ibrahimi, zyrtar për planifikim emergjent në Komunën e Gjilanit, theksoi se janë dy lloje fatkeqësish në Kosovë, fatkeqësitë e shkaktuara nga natyra dhe nga njeriu. Ai edhe njëherë theksoi se Komuna e Gjilanit është në zonë aktive të tërmeteve, të cilat nuk mund të parandalohen, por dëmet mund të zvogëlohen.     

Prezentimi i Zoran Milutinovic, Ph.D. nga Instituti i Ingjinjerisë së Tërmeteve dhe Seizmologjisë në Shkup (ISIIS) u ndal te tërmeti i Shkupit në vitin 1963 dhe shifrat fatale të këtij tërmeti. Sipas tij, zona mesdhetare në Evropë është zonë aktive e tërmeteve. Duke marrë parasysh se  pjesëmarrësit në këtë puëntori ishin nxënës të gjimnazit, ai i siguroi ata se nuk ka vend për panikë në rast të tërmeteve pasiqë shkollat kanë strukturë më të fortë se sa shtëpitë e tyre. Ai veç tjerash shpjegoi se në rast të tërmeteve duhet të përcillen instruksionet e nevojshme.

Në fund, drejtori i shkollës e përshëndeti këtë punëtori duke theksuar se këto punëtori janë të rëndësishme dhe ai e përshëndeti Komunën e Gjilanit dhe ekipën e MuSPP-it për ngritjen e vetëdijes së nxënësve për fatkeqësitë natyrore.