Kryetari i Hanit të Elezit, z.Rufki Suma dhe Udhëheqësja e Programit të Planifikimit Hapësinor Komunal (MuSPP) znj. Krystyna Galezia, i shkëmbyen Marrëveshjet e Bashkëpunimit për implementimin e Projektit Investues Kapital (CIP) për rregullimin e qendrës së qytezës së Hanit të Elezit. Ceremonia u mbajt me 19 Tetor në Sallën Komunale.

Zhvillimi i këtij projekti doli nga shumë punëtori tematike dhe takime konsultative në mes të Komunës, shoqërisë civile dhe stafit të MuSPP/UN-HABITAT-it. Projekti u hartua krahas me procesin “në shtëpi” të hartimit të Planit Zhvillimor Komunal të Hanit të Elezit, poashtu i mbështetur nga MuSPP-i.

Krystyna Galezia, Udhëheqëse e MuSPP-it theksoi se “është mëse e rëndësishme që qytetarëve të Hanit të Elezit t‘u ofrohet një qytet i mirë dhe i gjelbër, nga i cili qytetarët dhe autoritetet do të jenë krenarë”.

Rufki Suma, kryetar i Hanit të Elezit e shprehu mirënjohjen e tij për MuSPP-in, implementuar nga UN-HABITAT-i për kontributin dhe mbështetjen për proceset e planifikimit në këtë komunë.

Kostoja totale e projektit vlerësohet të jetë 70 mijë euro dhe do të mbulohet në mënyrë të barabartë nga MuSPP-i i financuar nga Agjensia Suedeze për Kooperim dhe Bashkëpunim Ndërkombëtar (Sida) dhe Komuna e Hanit të Elezit.