Hani i Elezit është komuna e dytë  që ka filluar hartimin e “bërjes vet” të Planit Zhvillimor Komunal (PZHK) me kapacitete komunale. Drejtoria Komunale për Urbanizëm, Gjeodezi dhe Mjedis është duke e hartuar PZHK-në në mbështetje të Programit të Planifikimit Hapësinor Komunal, implementuar nga UN-HABITAT-i dhe i financuar nga SIDA. Ky dokument ka karakter të planit multi-sektorial që ka për synim të ofrimit të qëllimeve dhe vizionit të qartë për zhvillimin e ardhshëm hapësinor në territorin e komunës.

Me 17 Dhjetor 2010, në ora 11, në Shtëpinë e Kulturës në Hanin e Elezit, do të bëhet hapja ceremoniale e shqyrtimit Publik të draftit të Planit Zhvillimor Komunal 2010-2025+. Shqyrtimi Publik do të jetë i hapur deri me 17 Shkurt 2011, në ora 11:00. Shqyrtimi publik është rasti i fundit për qytetarët dhe akterët e ndryshëm që t’i ofrojnë pikëpamjet e tyre, komentet, të ngrisin çështje dhe të japin propozime, para se plani të dërgohet në Ministrinë e Mjedisit dhe Planifikimit Hapësinor për pëlqim dhe para miratimit përfundimtar nga Asambleja Komunale e Hanit të Elezit.