Të martën, me 25 Janar 2011, kryetari i Mitrovicës, z.Avni Kastrati dhe Udhëheqësja e Programit të Planifikimit Hapësinor Komunal (MuSPP) znj. Krystyna Galezia e nënshkruan Marrëveshjen e Bashkëpunimit për implementimin e Projektit Investues Kapital për “Korridorin e Gjelbër të Lumit Lushta”.

Korrdidoret e gjelbëra përgjatë lumenjve të qytetit janë koncepti më domethënës i rregullimit të hapësirave të gjelbëra dhe të kaltëra, dhe kështu paraqiten edhe në Planin Zhvillimor Komunal. Lumi Lushta është njëri nga lumenjtë që kalon nëpër qendër të qytetit dhe është i vështirë të kalohet skaj tij.  Qëllimi i projektit investues kapital është që ta japë një kontribut të fuqishëm në krijimin e Korridorit të Gjelbër të Lumit Lushta, duke e fuqizuar funksionin e tij si korridor i transportit jo-motorik duke e rregulluar qasjen në rrugë dhe në shtegun për këmbësorë. Rregullimi i shtegut për këmbësorë, do të shërbejë si një lidhje për transportin jo-motorik duke ofruar qasje të sigurtë dhe të shpejtë deri në qendër të qytetit për banorët që jetojnë në pjesën jugore dhe atyre që jetojnë në qendër ta shijojnë peizazhin e bukur dhe gjysmë rural rreth Lumit Lushta dhe fshtrave përreth tij.

Intervenimi më i madh në këtë projekt do të bëhet në udhëkryqin te Teuta/Selaci në qendër të qytetit, aty ku Lushta kalon nën shëtitoren qëndrore. Intervenimet tjera kanë të bëjnë me përmirësimin e lidhjes me rrjetin e shtigjeve të qytetit në pjesën jugore te lumit, largimin e mbetjeve në lum dhe krijimin e një zone të re publike me karakteristika të ndryshme urbane. Projekti u zhvillua dhe u implementua bashkarisht nga komuna dhe banorët, organizatat e shoqërisë civile që i përfaqësojnë interesat e njerëzve me nevoja të veçanta dhe atyre të shërbimeve publike, në një seri të takimeve konsultative dhe punëtorive.

Në fjalën e tij hyrëse, Kastrati e falenderoi UN-HABITAT-in për përkrahjen e vazhdueshme dhënë Komunës së Mitrovicës në adresimin e çështjeve me rëndësi në menagjimin dhe planifikimin urban, duke e nënvizuar bashkëpunimin e mirë me këtë organizatë.

Krystyna Galezia, Udhëheqësja e MuSPP-it e shprehu kënaqësinë e saj për bashkëpunimin e mirë dhe nënshkrimin e marrëveshjes për implementimin e këtij projekti, i cilësuar si shumë i rëndësishëm për qytetin.

“Korridori i Gjelbër i Lumit Lushta” është projekt i financuar në shkallën 50%/50% nga ana e Komunës së Mitrovicës dhe Programit të Planifikimit Hapësinor Komunal, Faza 2 e UN-HABITAT-it në Kosovë, financuar nga Agjensia Suedeze për Bashkëpunim Ndërkombëtar, SIDA. Kostoja e këtij projekti vlerësohet të jetë rreth 300 000 Dollarë amerikanë.