Ceremonia e hapjes së shqyrtimit publik të Strategjisë dhe Planit të Veprimit për Parandalimin dhe Rregullimin e Vendbanimeve Joformale 2011 – 2015, u mbajt të Enjten, me 10 Mars 2011 në objektin e ministrive “Rilindja”. Kjo strategji është hartuar nga Ministria e Mjedisit dhe Planifikimit Hapësinor (MMPH).

Drejtori i Drjetorisë së Planifikimit Hapësinor (DPH), Agim Radoniqi, e hapi takimin duke shpjeguar se Kosova e ka nënshkruar deklaratën e Vjenës për vendbanimet joformale në vitin 2005, dhe me këtë qëllim edhe kjo strategji për vendbanimet joformale është zhvilluar. Sipas tij, diskutimi publik do të vazhdojë për 30 ditë. Shqyrtimi publik u jepë mundësi palëve të ndryshme që t’i japin pikëpamjet dhe komentet e tyre, dhe t’i ngrisin çështjet dhe brengat e tyre.

Znj. Vjollca Puka, nga DPH e prezentoi “Situatën Aktuale me Vendbanimet Joformale në Kosovë”. Prezentimin e fillloi duke u ndalur te metodologjia e përdorur për mbledhjen e të dhënave për vendbanimet joformale, duke vazhduar më pas me analizën në kontekstin politik dhe institucional si dhe me informacionin bazik se në çka e ka mbështetur pregatitjen e raportit. Në prezentim ajo e përmendi edhe mbështetjen e dhënë nga sektorët tjerë të ministrive, institucionet qeveritare si dhe nga organizatat ndërkombëtare si UN-HABITAT-i, OSBE-ja dhe LOGOS-i.

Më pas ajo theksoi se në Kosovë janë 174 vendbanime joformale, ose nëse shpjegohet në mënyrë territoriale rreth 64% e territorit të përgjithshëm është e mbuluar me këto vendbanime, ku jetojnë rreth 150,724 banorë.

Suzana Goranci nga DHP vazhdoi me przentimin e “draft Strategjisë dhe Planit të Veprimit për Parandalimin dhe Rregullimin e Vendbanimeve Joformale 2011 – 2015”. Takimi vazhdoi me komente dhe sqarime nga pjesëmarrësit dhe MMPH-ja.