Një grup prej 19 përfaqësuesve të komunave kosovare, të Ministrisë së Mjedisit dhe Planifikimit Hapësinor, Asociacionit të Komunave të Kosovës dhe Programit për Mbështetjen e Planifikimit Hapësinor Komunal nga UN-HABITAT (MuSPP) i vizituan disa komuna në Suedi prej 12-17 shtator 2011. Qëllimi kryesor i kësaj vizite studimore ishte familjarizimi me sistemin suedez të planifikimit dhe zbatimin praktik të parimeve për zhvillimin e qëndrueshëm. Vizita u organizua nga MuSPP me financimin e Sida-s, në bashkëpunim me katër komunat, ku bashkë me mysafirët nga Kosova janë shkëmbyer prezantime dhe përvoja të ndryshme. 

Vizita studimore vazhdoi në komunën e Söderköping-ut, një qytet tregtar i rëndësishëm gjatë mesjetës, si dhe banjë e famshme e kohës moderne. Kjo komunë e vogël sot përfiton më së shumti nga turistët, të cilët vijnë gjatë verës për ta vizituar një kanal tejet tërheqës (Göta Kanal) i ndërtuar në shekullin e 19-të. Pjesëmarrësit i priti Drejtori i Departamentit të Planifikimit, i cili u tregoi atyre për planet zhvillimore të hollësishme të përgatitura nga komuna dhe për procedurat për zbatimin e tyre. Procesi i zhvendosjes së autostradës evropiane e cila e ndan këtë qytet në dy pjesë, ishte gjithashtu një temë shumë interesante e diskutimit në këtë komunë. Ky projekt ishte ilustrim i bashkëpunimit të avancuar ndërmjet nivelit qendror dhe atij lokal gjatë planifikimit.
Linköping-u ishte ndalesa e tretë gjatë kësaj vizite në Suedi, një qytet në rritje i cili e ka përgatitur planin zhvillimor të përgjithshëm bashkë me qytetin fqinjë Norrköping. Në fillim, para grupit u fol për pikat kryesore të veprimtarive të planifikimit që janë në vijim e sipër. Mysafirët nga Kosova bënë një shëtitje të gjatë nëpër qytet, ku i vizituan zhvillimet më të rëndësishme që ishin duke ndodhur në qytet si dhe ato që ishin të planifikuara. Po ashtu, gjatë ditës në Linköping u realizua vizita në Tekniska Verken dhe në objektet e tyre, si Impianti i ri për riciklim, Ngrohtorja e Qytetit dhe Impianti për trajtimin e ujërave të zeza. Tekniska Verken është një kompani komerciale në pronësi të Komunës së Linköping-ut dhe e mbulon tërë rajonin. Pjesëmarrësit patën mundësi të shohin se si mund të prodhohet energjia dhe ngrohja nga mbeturinat. Të gjithë të pranishmëve ju prezantua në hollësi i tërë procesi, duke filluar nga deponia e mbeturinave, duke e përfshirë procesin e trajtimit të mbeturinave e deri te prodhimi i energjisë elektrike. Pjesa e pasdites ishte ndarë për prezantimet nga stafi për planifikim i komunës. Krahas shumë temave, u prezantua edhe lëvizshmëria dhe menaxhimi i komunikacionit në qytetin e Linköping-ut. Po ashtu, u theksua mënyra se si ky qytet i stimulon dhe punon intensivisht në politikat dhe masat e marra për promovimin e transportit jo-motorik dhe atij publik. Sistemi Informativ Gjeografik (GIS) u tha të jetë një mjet efikas, i cili është duke u shfrytëzuar për planifikim dhe për menaxhimin urban.
Ndalesa e fundit gjatë vizitës studimore në Suedi u bë në Komunën e Botkyrka-s, që ndodhet në pjesën jugore të zonës Metropolitane të Stokholmit dhe ku imigrantët përbëjnë një pjesë të madhe (rreth 50%) të numrit të përgjithshëm të banorëve të komunës. Zhvillimi i qëndrueshëm në këtë komunë ishte njëri nga prezantimet e bëra nga zyrtarët e komunës, si dhe gjatë prezantimit është shpjeguar mënyra se si është duke punuar komuna me Zotimet Aalborg. Drejtori i Njësisë për Planifikim e bëri një prezantim për planifikimin strategjik dhe integrimin e komunës në zonën metropolitane. Po ashtu, mysafirët nga Kosova mësuan edhe për pjesëmarrjen dhe proceset e saj gjatë diskutimeve publike të planeve, për stimulimin publik dhe për praktikat që i aplikon kjo komunë.
Përvojat nga vizita studimore në Suedi do të shkëmbehen me pjesëmarrësit tjerë në Ditën Botërore të Habitatit më 3 dhjetor 2011.