Ministria e Mjedisit dhe Planifikimit Hapësinor si dhe 12 komuna të Kosovës, do të përfitojnë nga faza e tretë e Programit të mbështetjes së planifikimit hapësinor komunal (MuSPP).

Ky program i implementuar nga UN-HABITAT-i dhe i financuar nga qeveria Suedeze,paraqet vazhdimësinë e proceseve dhe metodave të aplikuara në programet e mëhershme me fokus të qartë në fuqizimin e kapacitetit të planifikimit dhe menaxhimit të komunave, për përkrahjen e zhvillimit të qëndrueshëm.

Të pranishëm në hapjen zyrtare të këtij programi ishin përfaqësues të lartë të Ministrisë së Mjedisit dhe Planifikimit Hapësinor, Ministrisë së Administrimit të pushtetit lokal, Sida-s zyrës në Suedi dhe Kosovë, zyrë qendrore të UN-HABITAT-it në Nairobi, asociacioni i Komunave të Kosovës, kryetarët dhe nënkryetarët e komunave të Kosovës.

Udhëheqësja e zyrës së UN-HABITAT-it në Kosovë, Z. Krystyna Galezia dha një pasqyrë të programit paraprak si dhe paraqiti objektivat e programit të ri. Zëvendës Ministri i Mjedisit dhe Planifikimit Hapësinor z. Ilir Mirena potencoi që MMPH është e përkushtuar që të bashkëpunojë edhe me tutje me programin e UN-HABITAT-it i cili ka për qëllim ngritjen e kapaciteteve komunale dhe është i hartuar duke marrë për bazë nevojat e Kosovës. Gjithashtu theksoi qasjen e UN-HABITAT-it e cila ka një vlerë të veçante sepse është e ndërtuar në bazë të transparencës dhe gjithëpërfshirjes, si dhe ndihmon në zhvillimin e komunave në përputhje me parimet themelore  të Bashkimit Evropian. z. Basri Musmurati zv. Ministër i Administrimit të Pushtetit Lokal çmoi lartë përkrahjen që ky program ua jep komunave të Kosovës , posaçërisht komunave të reja. Përfaqësuesi i Sida-s në Suedi, theksoi se metodat dhe teknikat e përdoraura dhe iniciuara nga ky program siç janë  vizionimi, zhvillimi i skenarëve, dizajni urban etj kanë ndikuar në përmirësimi e hapësirave publike dhe jetës së qytetarëve në këto komuna. Përfaqësuesit e zyrës qendrore të UN-HABITAT-it në Nairobi e veçuan këtë projekt si unik, i cili do të shërbejë si përvojë dhe model edhe për programet tjera në botë.  

Kryetarët dhe nënkryetarët e pranishëm të komunave përfituese të programit siç janë: Prizreni, Peja, Mitrovica, Ferizaj, Gjilan, Malisheva, Rahoveci, Junik, Hani i Elezit, Gracanica dhe Parteshi, reflektuan mbi të arriturat e programeve të kaluara dhe treguan gatishmërinë për vazhdimin e bashkëpunimit në fazën e tretë.

Përmbajtja e programit është përgatitur duke marrë parasysh prioritetet e qeverisë së Kosovës, nevojat e raportuara prej komunave, objektivat e bashkëpunimit të Sida-s dhe mandatin e UN-HABITAT-it, si dhe mësimet e mësuara dhe përvojat prej fazave të mëhershme të MuSPP-it. Ky program do të zgjas 3 vjet deri në nëntor të vitit 2014.