Dizajnerë nga Australia, Suedia dhe Kosova, fitues të Konkursit Ndërkombëtar për Qendrën e Mobilitetit në Ferizaj do të nderohen në një ceremoni të veçantë me 9 Shtator 2008, në ndërtesën e Hekurudhave të Kosovës në Fushë Kosovë.

Ky aktivitet do të përcillet nga prezentimi dhe debati me qytetarë në Komunën e Ferizajt. Pjesë e ceremonisë së dhënies së çmimeve do të jetë edhe punëtoria profesionale me 10 Shtator 2008, që do të fokusohet në rolin e hekurudhës në stimulimin e zhvilimit lokal, regjional dhe kombëtar.

Në ditën e fundit, me 11 Shtator 2008, 43 punimet e pranuara për “Konkursin Ndërkombëtar të Qendrës së Mobilitetit në Ferizaj” do të jenë të hapura për publik në Modelariumin e Fakultetit të Arkitetkurës, në Univerzitetin e Prishtinës.