Si në shumë qytete në mbarë botën, Dita Botërore e Habitat-it u festua edhe në qytetin historik të Prizrenit në Kosovë. Me këtë rast UN-HABITAT-i u bashkua në festimin e kësaj date së bashku me Komunën e Prizrenit dhe Organizatën për Siguri dhe Bashkëpunim në Evropë (OSBE).

Ceremonia e ndarjes së cmimeve u organizua në sallën komunale të Komunës së Prizrenit. Për ta shënuar këtë datë prezent ishin përfaqësues të autoritetit lokal, nga Programi për Planifikim Hapësinor Komunal i UN-HABITAT-it, OSBE-ja, nxënës të cilët morën pjesë në garën për shkrimin e eseve, mediat si dhe përfaqësues të organizatave tw tjera ndërkombëtare. Aktiviteti filloi me fjalët hyrëse nga ana e organizatorëve, të cilët i nënvizuan çështjet dhe problemet me të cilat ballafaqohet jeta në zonat urbane në shekullin e 21. Po ashtu në fokus u vë nevoja e zhvillimit të qasjeve të menqura, të reja dhe atyre përfshirëse në adresimin e sfida të urbanizmit.

Të gjithë nxënësit u nderuan me certifikata për pjesëmarrjen në këtë garë por gjithashtu edhe patën mundësi që esetë e tyre t’i lexojnë para audiencës së mbledhur në Sallën Komunale të Prizrenit. Nga kjo, u zhvillua një debat interaktiv, ku nxënësit patën mundësi t’u shtrojnë pyetje autoriteteve komunale për shqetësimet, planet dhe mangësitë e vizionit komunal për projektet lokale si dhe në çështje tjera urbane.  

Esetë kishin të bënin me një varg çështjesh globale, si: ngrohja globale, efekti i zonave të gjelbëra, mungesa e transportit publik urban, banimi social, mbrojtja e trashëgimisë kulturore, burimet alternative të energjisë, zhvillimi ekonomik si dhe çështje të tjera bashkëkohore në mbarë botën.

Dita Botërore e Habitat-it festohet në mbarë botën që nga 1986. Është aktivitet që mbahet në të Hënën e parë të Tetorit, ku çdo vit tema kryesore që i adreson sfidat kryesore të kohës ndryshon dhe qw vendoset nga UN-HABTAT-i.