Me 2009 Komuna e Hanit të Elezit e filloi hartimin e draftit të Planit Zhvillimor Komunal dhe atij Urban. Procesi është i  mbështetur nga MuSSP-i, i financuar nga SIDA dhe i implementuar nga UN-HABITAT-i. Një progres substancial është arritur në hartimin e këtyre planeve, ku PZHK-ja vetëm se ndodhet në shqyrtim publik. Në tetor të 2010, Ligji i Vlerësimit Strategjik Mjedisor u miratua nga Parlementi i Kosovës. Drafti i PZHK-së u hartua para se Ligji të miratohej, por megjithkëtë Komuna e Hanit të Elezit vendosi ta hartojë VSM-në, në përputhje me ligjin në fjalë. Hani i Elezit do të shërbejë si test, ngase është hera e parë që po hartohet ky raport siç edhe është potencuar në takimet me MMPH-në, ku eksperienca e fituar do të aplikohet në planet tjera komunale.  

Raporti i studimit u hartua në Dhjtor të 2010 dhe u finalizua në Janar të 2011 në bashkëpunim me zyrtarët komunalë dhe të MuSPP-it të ekipës së planifikimit të Hanit të Elezit.

Hapja e diskutimit publik të Vlerësimit Strategjik Mjedisor të PZHK-së u bë të Enjten, me 10 Mars 2011 në sallën e Kuvendit Komunal në pjesëmarrje të përfaqësuesve të shoqërisë civile, të kuvendit komunal, REC-ut dhe stafit të MuSPP-it. Qëllimi I këtij takimi ishte të prezentohet procesi i hartimit të raportit të VSM-së dhe të gjetjeve, por gjithashtu edhe t’i mbledhë mendimet dhe opinionet e institucioneve relevante dhe publikut të interesuar.

Këshilltari i Kryetarit dhe moderatori i këtij takimi, Z. Mallzum Qajani në fjalën e tij hyrëse e falenderoi UN-HABITAT-in për mbështetjen e dhënë në hartimin e planeve zhvillimore dhe VSM-së. “Është me rëndësi për banorët e Hanit të Elezit dhe autoritetet komunale, ta kuptojnë ndikimin e propozimeve të Mjedisit ne Planin Zhvillimor Komunal, duke përfshirë edhe masat për lehtësimin e ndikimit” theksoi z. Qajani, duke potencuar se Hani i Elezit ka shumë çështje që kanë të bëjnë me mjedisin.

Takimi vazhdoi me fjalimin e z. Muzafer Dernjani, Zëvendës Kryetar i Hanit të Elezit dhe z.Ishaku Maitumbi, Zyrtar në detyrë i UN-HABITAT-it, ku ky i fundit e theksoi bashkëpunimin e mirë ndërmjet Komunës dhe UN-HABITAT-it, ku progresi shihet çdo herë që ai e viziton Hanin e Elezit..

Z. Durim Dernjani, Zyrtar Komunal në Han të Elezit, e prezentoi raportin e VSM-së dhe theksoi se ky dokument është pjesë e pandashme e PZHK-së dhe i inkurajoi të gjithë qytetarët të japin komnetet si në takim ose gjatë 30 ditëve sa do të jetë i hapur shqyrtimi publik. Përfaqësuesit e REC-ut i kërkuan disa sqarime shtesë për dokumentin dhe shprehën gatishmërinë e tyre për bashkëpunim të afërt me këtë komunë, ku edhe u mirëpritën nga përfaqësuesit e Hanit të Elezit. Në pjesën e fundit, u shpjeguan edhe njëherë këto dokumente dhe procedura se si këto dokumente (draft PZHK-ja dhe draft VSM-ja) do të dërgohen në MMPH për pëlqim dhe përfundimisht të miratohen nga Komuna e Hanit të Elezit.